נחום יודס קינדערלידער האָבן באַרײַכערט דעם רעפּערטואַר פֿון די וועלטלעכע שולן. אין פּוילן איז געווען באַרימט זײַן ליד "מיר קומען אָן"; אין אַמעריקע האָט מען געזונגען זײַן "ליד צו דער ייִדישער שול", "ניט־געשטויגן — ניט־געפֿלויגן". אויף דער פּלאַטע פֿון "גאָלדענעם לאַנד" וואָס דער אַרבעטער־רינג האָט אַרויסגעגעבן אונטער יאָסל מלאָטעקס נאַראַציע, האָט מען געזונגען זײַן ליד "אַמעריקע". די מוזיק וואָס פֿאַרשיידענע קאָמפּאָזיטאָרן האָבן געשאַפֿן איז געווען צוגעפּאַסט צו נחום יודס פּשוטע און חנעוודיקע ווערטער.

נחום יוד איז דער פּסעוודאָנים פֿון נחום יערוסאַלימטשיק. ער איז געבוירן געוואָרן אין באָבער, מאָהיליעווער געגנט, ווײַסרוסלאַנד. ביז 14 יאָר האָט ער געלערנט אין חדר, און גלײַכצײַטיק געלערנט וועלטלעכע לימודים בײַ פּריוואַטע לערערס און דורכגעמאַכט אַ מיטלשול־קורס. ער האָט אָנגעהויבן שרײַבן לידער אין רוסיש, דערנאָך איז ער אַריבער צו ייִדיש. זײַנע ערשטע ייִדישע לידער האָט ער פֿאַרעפֿנטלעכט אין וואַרשע אין . 1913אין 1916 איז ער אָנגעקומען קיין אַמעריקע, וווּ ער האָט געדרוקט לידער, פֿאַבעלן, און דערציילונגען אין אַ סך צײַטשריפֿטן און געדרוקט אַ צאָל ביכער. פֿאַר צענדליקער יאָרן איז ער געווען אַן אינעווייניקסטער מיטאַרבעטער פֿון "פֿאָרווערטס", וווּ עס פֿלעגט דערשײַנען יעדע וואָך זײַנס אַ ליד אָדער אַ פֿאַבעל. אין זײַן לעצטן בוך "געבענטשטע שעה" האָט ער געדרוקט כּמעט אַלע זײַנע לידער אויף איבער 700 זײַטן. ער איז געשטאָרבן אין 1966.

דאָס ערשטע פֿון זײַנע קינדער־לידער וואָס מיר דרוקן הײַנט האָט מען געזונגען מיט צוויי מעלאָדיעס. די ערשטע מעלאָדיע האָט הערש וואָלאָוויטש געשאַפֿן. די צווייטע מעלאָדיע פֿון ש. וויינער איז געדרוקט אין דער זאַמלונג "יום־טובֿדיקע טעג" פֿון חנה מלאָטעק און מלכּה גאָטליב. די ווערטער זײַנען:

אין פּוילן איז געווען פּאָפּולער נחום יודס ליד "מיר קומען אָן", מיט מוזיק פֿון יאַנקל טרופּיאַנסקי, וואָס איז געוואָרן דער הימען פֿון דער מעדעם־סאַנאַטאָריע אין מיעדזעשין, ניט ווײַט פֿון וואַרשע. עס ווערט געזונגען אין דעם פּרעכטיקן פֿילם פֿון דער סאַנאַטאָריע. די אָריגינעלע ווערטער זײַנען:

מיר קומען אָן

אַ פּאָפּולער הומאָריסטיש ליד איז זײַן ליד "ניט־געשטויגן — ניט־געפֿלויגן" וועלכע יוסף טשערניאַווסקי האָט געקליידט מיט אַ חנעוודיקער מעלאָדיע. די איבערגעטריבענע אימאַזשן, ליגנס און קאָמישע שטעלן האָבן קינדער ליב געהאַט צו זינגען:

ניט־געשטויגן — ניט־געפֿלויגן

דאָס פֿערטע ליד וואָס מיר האָבן דערמאָנט בײַם אָנהייב איז זײַן ליד צו אַמעריקע, מיט מוזיק פֿון מיכל געלבאַרט. דאָס ליד ווערט געזונגען צום סוף פֿון דער פּלאַטע "דאָס גאָלדענע לאַנד", אין וועלכן געלבאַרט האָט אַרײַנגעפֿלאָכטן טענער פֿון דעם אַמעריקאַנער הימען:

צו אַמעריקע

מוזיק צו נאָך עטלעכע לידער פֿון נחום יוד וואָס געפֿינען זיך אין פֿאַרשיידענע כרעסטאָמאַציעס זײַנען: "אין וואַלד" פֿון מיכל געלבאַרט, "פֿאָרויס" פֿון הערש וואָלאָוויטש, "אונדזערע טעג" פֿון מ. ירדיני. מיר זײַנען זיכער, אַז די לייענער, וואָס זײַנען געגאַנגען אין די ייִדישע שולן, וועלן זיך דערמאָנען אָן נחום יודס לידער מיט פֿרייד, און אפֿשר וועלן זיי זיי מיטזינגען אויך.