יאָני (יונתן) ראָט

מיט אַ מאָל ווערט מען אַ העלד דורך די שווערסטע אומשטאַנדן און אין די אויסשטערלישע ערטער. בינט דזשבייל, לבֿנון, וואָס שטייט אַ קנאַפּע דרײַ קילאָמעטער פֿון דער גרענעץ מיט ישׂראל, איז אָט אַזאַ מין אָרט. אַ מאָל איז די שטאָט געווען אונטער דער ישׂראלדיקער סוּווערעניטעט. אָבער נאָכן ישׂראלדיקן צוריקצי אין 2000, האָט די טעראָר־אָרגאַניזאַציע "כעזבאָלאַ" זי אײַנגענומען, און איצט איז זי געוואָרן די "הויפּטשטאָט פֿון 'כעזבאָלאַ'".

מיט פֿינף יאָר צוריק איז אין בינט דזשבייל פֿאָרגעקומען איינע פֿון די שווערסטע שלאַכטן בעת דער מלחמה צווישן ישׂראל און לבֿנון. דעמאָלט האָט מדינת־ישׂראל פֿאַרלוירן 14 זעלנער און 31 זעלנער זײַנען פֿאַרוווּנדיקט געוואָרן.

במשך פֿון דער שלאַכט איז "יאָני" (יונתן) ראָט, אַ פֿרומער בחור פֿונעם ייִשובֿ "בית־אל", פֿאַרוווּנדיקט געוואָרן דרײַ מאָל אין רוקן. איין קויל האָט אויך דורכגעשאָסן אַ לונג. יאָני, וואָס איז דעמאָלט געווען אַ סערזשאַנט, געדענקט ביז הײַנט דעם דאָזיקן מאָמענט.

על־פּי־נס האָט יאָנין זיך אײַנגעגעבן אַוועקצוקריכן אונטער אַ שטיין. איז ער דאָרטן געליגן אויפֿן בויך און געוואַרט, אַז עמעצער פֿון זײַנע חבֿרים זאָל אים ראַטעווען. ער האָט געפֿילט, ווי ס׳ווערט אים שווער צו אָטעמען. אין דעם מאָמענט האָט ער זיך געפֿרעגט: "זאָל איך שרײַען, אָדער בלײַבן ליגן שטילערהייט? וועמען וועט מען קודם־קול ראַטעווען: דעם וואָס שרײַט, אָדער דעם וואָס ליגט שטיל, אַזוי ווי ער האַלט שוין נאָענט צום טויט?"

יאָני געדענקט שוין ניט, וואָס ער האָט באַשלאָסן צו טאָן, אָבער, סוף־כּל־סוף, האָט עמעצער אים געפֿונען און אים געראַטעוועט. ער באַשרײַבט זײַן "קאַמף" צו ווערן געזונט, אַזוי:

נאָכן געזונט ווערן האָט יאָני זיך צוריק אומגעקערט אין דער אַרמיי און געדינט ווי אַן אָפֿיצער. אין 2007 האָט ער געקראָגן אַ מעדאַל פֿאַרן עוואַקויִרן פֿונעם שלאַכטפֿעלד די טויטע און פֿאַרוווּנדיקטע זעלנער במשך פֿון מער ווי צוויי שעה.

לעצטנס, איז יאָני ראָט געהעכערט געוואָרן צום ראַנג פֿון קאַפּיטאַן, און איצט שטודירט ער אינעם העברעיִשן אוניווערסיטעט אין ירושלים. קאַפּיטאַן ראָט איז אַ חתונה־געהאַטער און דערציט, אין איינעם מיט זײַן ווײַב, צוויי קינדער.