דעם 30סטן מײַ 1912 איז אין דעם בוקאָווינער שטעטל וויזשניץ געבוירן געוואָרן דער ייִדישער שרײַבער יוסף בורג. אין זײַן יוגנט האָט ער זיך געלערנט אין ווין, אָבער נאָך דעם "אײַנשלוס" האָט ער געמוזט זיך אומקערן אין בוקאָווינע, קיין טשערנאָוויץ. אַזוי איז ער געוואָרן אַ סאָוועטישער בירגער, ווײַל טשערנאָוויץ, ביז אַהער אַ שטאָט אין רומעניע, איז זומער 1940 אָקופּירט געוואָרן דורך דער רויטער אַרמיי און איז געוואָרן אַ טייל פֿון סאָוועטן-אוקראַיִנע. אַזוי — שוין אַן אוקראַיִנישע שטאָט — בלײַבט טשערנאָוויץ ביזן הײַנטיקן טאָג.
הגם בורגס ערשטע ווערק האָבן זיך באַוויזן אין צײַטשריפֿטן נאָך אין די 1930ער יאָרן און פֿון צײַט צו צײַט פֿלעגן זײַנע דערציילונגען זיך באַווײַזן אין דעם מאָסקווער זשורנאַל "סאָוועטיש היימלאַנד", איז ער געוואָרן באַזונדערס באַקאַנט סוף 1980ער יאָרן. דעמאָלט האָבן אין דײַטשלאַנד אָנגעהויבן אַרויסגיין איבערזעצונגען פֿון זײַנע ווערק. אַ דאַנק דעם פֿונאַנדערפֿאַל פֿונעם סאָוועטישן רעזשים, איז געפֿאַלן דער "אײַזערנער פֿירהאַנג", וואָס האָט געהאַלטן פֿאַרמאַכט די סאָוועטישע וועלט. ווי אַ פּועל-יוצא, האָט בורג באַקומען די מעגלעכקייט אַרויסצופֿאָרן פֿון לאַנד, און ער איז געוואָרן אַן אָפֿטער און אָנגעלייגטער גאַסט אין די דײַטש-רעדנדיקע לענדער.
יוסף בורג איז געווען אַקטיוו אויך אין זײַן שטאָט. ער איז געשטאַנען בראָש דער היגער ייִדישער קולטור-אָרגאַניזאַציע. אויף אַ קורצער צײַט האָט זיך אים אײַנגעגעבן צו באַנײַען (דער עיקר, סימבאָליש) די צײַטונג "טשערנאָוויצער בלעטער", וועלכע פֿלעגט אַרויסגיין פֿאַר דער צווייטער וועלט-מלחמה. מענטשן פֿלעגן פֿאָרן קיין טשערנאָוויץ צו באַגעגענען זיך מיט דעם אַלטן אינטעלעקטואַל, וואָס האָט אין זיך געטראָגן די חכמה פֿון עטלעכע קולטורן: ייִדישער, רוסישער, דײַטשישער. מע האָט אין אים געזען אַ לעבעדיקן סימבאָל פֿון דעם דור און דער צײַט, וואָס איז שוין מער ניט געווען בנימצא.
מיט זײַן טויט, איז פֿאַרמאַכט געוואָרן דאָס לעצטע זײַטל אין דער געשיכטע פֿון ייִדישער ליטעראַטור ניט נאָר אין בוקאָווינע, נאָר אין גאַנץ אוקראַיִנע. אַן אינטערוויו מיט יוסף בורגן, פֿילמירט אין 2003, קען מען זען און הערן אין:http://www.facebook.com/video/video.php?v=739259855229