טײַערע חזנטע,

איך בין אַן אַקטריסע און אַ רעזשיסאָרין. לעצטנס האָב איך מסכּים געווען צו רעזשיסירן אַ פֿאָרשטעלונג אין מײַן שיל. מיר האָבן כּמעט אַ פּערפֿעקטע טרופּע, אָבער, ווי געוויינטלעך, איז אונדז שווערער צו געפֿינען מענער וועלכע זינגען, ווי פֿרויען. מיר האָבן געבעטן געוויסע אַקטיאָרן צו קומען און שפּילן. אָבער עס פֿעלט אונדז נאָך איין מאַן. גאָר נייטיק דאַרף איך אַ גוטן אַקטיאָר מיט אַ שיין קול. אַזוי ווי אונדזער טעאַטער איז, וואָס מע רופֿט אַ "קהילה־טעאַטער", דאַרף מען געפֿינען עמעצן, וואָס וועט זײַן איבערגעגעבן און אַרײַנלייגן שעהען אַרבעט, אָבער אָן קיין שום לוין.

אַנומלט, האָב איך באַגעגנט דעם מאַן, וואָס איז געווען מײַן אינטימער חבֿר אין גראַדויִר־שול. שוין יאָרן וואָס מיר האָבן זיך נישט געזען. אָבער איך ווייס, אַז ער קען זייער גוט זינגען און איז אַ גוטער אַקטיאָר — פּונקט צוגעפּאַסט פֿאַר דער ראָלע. איך בין שוין אַ חתונה־געהאַטע און מײַנע כּוונות זענען בלויז גוטע. צי פּאַסט עס, אַז איך זאָל דעם מאַן בעטן קומען אויף אַ פּראָבע?

רעזשיסאָרין

טײַערע חזנטע,

מײַן בחור פֿירט זיך אויף מיט מיר אויף אַן עקסטרעמען אופֿן, און איך ווייס נישט ווי דאָס צו באַהאַנדלען. אַמאָל הערט ער זיך צו צו מיר און וויל בלײַבן נאָענט צו מיר; ער גיט מיר אָפּ קאָמפּלימענטן, פֿאַרברענגט מיט מיר און איך פֿיל זיך גוט. אַנדערע מאָל בלײַבט ער פֿון דער ווײַטנס. איך הער נישט קיין וואָרט פֿון אים צוויי טעג לאַנג, און ווען מיר רעדן, סוף־כּל־סוף, האָט ער ווייניק וואָס צו זאָגן. ווי זאָל איך פֿאַרשטיין זײַן מאָדנע אויפֿפֿירונג?

אַ געפּלעפֿטע חבֿרטע

טײַערע חזנטע,

מײַן נאָענטסטע חבֿרטע האָט מיך תּמיד דערנידעריקט. זי איז נישט קיין מבֿין אויף זיך אַליין, און פֿאַרשטייט נישט, וואָס זי טוט; אָבער, זי טוט עס כּסדר. זי באַמערקט, למשל, אַז די קליידער וואָס איך טראָג זעען נישט גוט אויס אויף מיר, אָדער, אַז מײַנע פּלענער אויף סוף־וואָך זענען נישט אַזוי גוט ווי אירע פּלענער. זי מוז תּמיד זײַן בעסער פֿון מיר. נעכטן האָב איך זיך געפֿרייט, וואָס מע האָט מיך אויסגעקליבן צו זײַן אַ וועגווײַזערין פֿון אונדזער שול — אַ וואָלונטיר־אַרבעט — האָט זי געענטפֿערט, אַז אומזיסט וואָלט זי קיין מאָל נישט געאַרבעט, און דעם זומער וועט זי באַקומען אַרבעט וואָס ווערט באַצאָלט. ווי קען איך רעדן מיט איר, איך זאָל נישט פֿאַרלירן אַ פֿרײַנד?

גוטע־פֿרײַנד