December 2, 2011
רעצעפּטן
‫צונויפֿגעשטעלט פֿון שׂרה־רחל שעכטער


אויב עס גלוסט זיך אײַך אַ מאָל צוגרייטן אַן עלעגאַנט מאכל, מאַכט אַ פֿראַנצויזישע ציבעלע־זופּ. דאָס בעסטע ברויט אַרײַנצולייגן אין דער זופּ איז אַ שטריצל (איטאַליעניש אָדער פֿראַנצויזיש ברויט), אָבער איר קענט ניצן וואָסער ברויט איר ווילט.
די זופּ קאָכט מען, צום טייל, אין אַ הייסן אויוון; זײַט זשע זיכער, אַז די שיסעלעך אין וועלכער די זופּ באַקט זיך קענען אויסהאַלטן די היץ.


שפּריצבוימל
2 ציבעלעס, אין דינע רעפֿטלעך
1 לעפֿל נישט־געזאַלצענע פּוטער
1 לעפֿל בראָנפֿן
4 טעפּלעך פּאַרעווע ווייניק־געזאַלצענע יויך
זאַלץ און שוואַרצער פֿעפֿער, לויט אײַער געשמאַק
4 געדיכטע רעפֿטלעך שטריצל
1 טעפּל שווייצער קעז

באַשפּריצט אַ פּאַטעלניע מיט שפּריצבוימל און פּרעגלט די ציבעלע איבער אַ מיטעלן פֿײַער 15 מינוט, ביז עס ווערט ווייך און גאָלדן־ברוין. מישט אַרײַן די פּוטער
נעמט די פּאַטעלניע אַראָפּ פֿון פֿײַער און מישט אַרײַן דעם בראָנפֿן. שטעלט די פּאַטעלניע ווידער אויפֿן פֿײַער און מישט 30 סעקונדעס. גיסט אַרײַן די יויך און קאָכט עס ביז עס הייבט אָן צו זידן. פֿאַרקלענערט דאָס פֿײַער און קאָכט די זופּ נאָך 5 מינוט. באַזאַלצט און באַפֿעפֿערט זי.
הייצט אָן דעם אויוון ביז 450 גראַד (232 צעלזיוס). לייגט 4 אויוון־באַוואָרנטע שיסעלעך (ramekins, בלע״ז) אויף אַ בלעך. גיסט אין זיי אַרײַן די זופּ. לייגט אַרײַן אַ רעפֿטל ברויט אין יעדער שיסל, און באַשיט זיי מיטן קעז. שטעלט די בלעך מיט די שיסעלעך זופּ אין אויוון און באַקט בערך 4 מינוט, ביז די קעז שפּרודלט און ברוינט זיך צו.